Pidato Dr. Husaini Hasan uroë peu-ingat ulangthôn atjèh atjèh meurdèhka njang keu 34 thôn. stockholm, 4desember 2010. Alhamdulillahirabbil'alamin wassalatu wassalamu 'ala asrafil anbija i wal mursalin, wa 'ala alihi wa ashabihi adjma'in. Njang lôn peumulia para hadirin, bandum djama'ah njang meusapat disinoë, dan bandum muhadjirin bansa Atjèh pat mantong geuduëk ateuëh rhuëng dônja, njang peu-ingat uroë keumeurdéhkaan Atjèh, 4 december 1976. Njang that lôn meutjhén, ureuëng-ureuëng tjhik ulôn dan rakan seutia bansa Atjèh di tanoh ië sidéh di Atjèh. Njang that lôn gaséh dan sajang aneuk-aneuk ulôn, aneuk muda Atjèh generasi penerus, njang sambông perjuangan peumeurdéhka Atjèh dan peutheun keudaulatan dan marwah bansa ateuëh rhuëng dônja. -------------------Assalamu'alaikum warahmatullahi wabarakatuh. 4 december 1976 nakeuh uroë njang meuseudjarah that keu geutanjoë bangsa Atjèh, sabab bak uroë njoë, 34 thôn njang ka u likôt ka geuseubarô Proklamasi Atjèh Meurdéhka njang geupeunjata uléh Wali Neugara Tengku Hasan Mohammad di Tiro, di glé Tjokkan. Wilajah Atjèh Pidië. Pakon uroë njoë peunténg tapeu-ingat keu geutanjoë Atjèh? Meusabab deungon ureuëng Atjèh ka tuwo keu keumeurdéhkaan dan keudaulatan droëgeuh ateuëh Tanoh ië geuh Atjèh meutuah. Ka ulôn peurati dalam le that peukara ureuëng Atjèh ridjang that tuwo keu seudjarah. Padahai Seudjarah njan that peunténg. Saboh bagi nibak asoë al-quran nakeuh seudjarah. al. seudjarah ureuëng-ureuëng dan kawôm njang darôhaka keu Allah ...

PAKRIBAN GEUTANJOE TANGIENG DROETEUH ??? Uléh: Tgk Hasan di Tiro NJOËKEUH SABOH SU-EUË NJANG RAJEKTHAT KEU GEUTANJOË BANSA ATJÈH BAK MASA NJOË, NJANG WADJÉB TAPHAM UROË DAN MALAM. SABAB BAK DJEUNAWEUËB GEUTANJOË ATEUËH SU-EUË NJOËKEUH MEUGANTUNG NASIB BANDUM GEUTANJOË BAK MASA NJOË, NASIB KEUTURUNAN BAK MASA UKEUË DAN NASIB NANGGROË ATJEHNJOË ATEUËH RHUËNG DÔNJA. MEUNJO GEUTANJOË tangiëng droëteuh lagèë saboh bansa njang hina, njang leumôh, njang kon mulia, njang djeuët gop peungeut, njang djeuët gop peurintah wië-uneun, njang tém seumah bansa laén, njang tém teurimong peurintah nibak gop njang teuka, maka bansa geutanjoë keumeuëng hantjô, nan geutanjoë keumeuëng gadoh, Nanggroë Atjèh njoë keumeuëng djeuët keu djadjahan gop, dan bansa geutanjoë keumeuëng djeuët keu lamiët gop. Sabab meunjo tangiëng droëteuh lagèë saboh bansa njang hina, maka hana lé tjita-tjita dan seumangat keu mulia; meunjo tangiëng droëteuh leumoh, maka hana lé seumangat pahlawan, meunjo tangiëng droëteuh bangai, maka geutanjoë tadjak seutot bansa gop njang akibatdjih hana laén nibak keunong tipèë. Teutapi meunjo geutanjoë tangiëng droëteuh lagèë saboh bansa njang mulia-lagèë teuladan njang ka geubri lé éndatuteuh...maka geutanjoë han sagai tatém djipeurintah lé bansa gop njang tamong u nanggroë geutanjoë. Meunjo geutanjoë tangiëng droëteuh sibagoë saboh bansa njang mulia, njang hana sapeuë kureuëng nibak bansa laén, njang kon ngeut, njang kon leumoh, njang beuhô, njang teupeuë peuë keupeunténgan ...